စက်တင်ဘာ ၂၃ ရက်နေ့က အမေရိကန် သမ္မတ ဒေါ်နယ် ထရမ့် ထုတ်ဖေါ် အဆိုပြုခဲ့တဲ့ ဂါဇာ ငြိမ်းချမ်းရေး အစီအစဥ် ၂၁-ချက်

၁။ ဂါဇာသည် အစွန်းရောက်မှုကင်းသော၊ အကြမ်းဖက်မှုကင်းသော ဇုန်ဖြစ်ရမည် အိမ်နီးချင်းများ အပေါ် ခြိမ်းခြောက်မှု မရှိစေရ။

၂။ ဂါဇာကို ဂါဇာပြည်သူများ၏ အကျိုးအတွက် ပြန်လည် တည်ဆောက်ရမည်။

၃။ အစ္စရေးနှင့် ဟာမတ်စ်တို့ အနေနနဲ့ အဆိုပြုချက်ကို သဘောတူပါက စစ်ပွဲကို ချက်ချင်း အဆုံးသတ်ရမည်။ အစ္စရေးကာကွယ်ရေးတပ်ဖွဲ့ (IDF) သည် စစ်ဆင်ရေး အားလုံးကို ရပ်စဲပြီး ဂါဇာကမ်းမြှောင်မှ တဖြည်းဖြည်း ရုပ်သိမ်းရမည်။ ‌

၄။ အစ္စရေးက လူသိရှင်ကြား သဘောတူပြီးနောက် ၄၈ နာရီ အတွင်း ဓားစာခံ အားလုံးကို ပြန်လွှတ်ပေးရမည် (အသက်ရှင်သူနှင့် သေဆုံးသူများ အပါအဝင်)။

၅။ ဓားစာခံများ ပြန်ရောက်ပြီးပါက အစ္စရေးက တသက်တကျွန်းကျခံနေရသော ပါလက်စတိုင်း လုံခြုံရေး အကျဥ်းသား ရာပေါင်းများစွာနှင့် စစ်စတင်ချိန်မှစ၍ ဖမ်းဆီးထားသော ဂါဇာဒေသခံ ၁၀၀၀ ကျော် အပြင် ပါလက်စတိုင်း အလောင်း ရာပေါင်းများစွာကို ပြန်လွှဲပေးရမည်။

၆။ ဓားစာခံများ ပြန်ရောက်ပြီးပါက ငြိမ်းချမ်းစွာ အတူယှဥ်တွဲနေထိုင်ရေးကို ကတိပြုသော ဟာမတ်စ် အဖွဲ့ဝင်များကို လွတ်ငြိမ်းချမ်းသာခွင့် ပေးအပ်မည်။ ဂါဇာ ကမ်းမြှောင်မှ ထွက်ခွာ လိုသော ဟားမတ်စ်အဖွဲ့ဝင်များကို လက်ခံမည့် နိုင်ငံများသို့ လုံခြုံစွာ သွားလာခွင့် ပေးအပ်မည်။

၇။ ဤသဘောတူညီချက် ရရှိပြီးပါက အကူအညီများကို စီးဆင်းမှု မြှင့်တင်ရမည်။ ၎င်းသည် ၂၀၂၅ ခုနှစ် ဇန်နဝါရီလ ဓားစာခံ သဘောတူညီချက်တွင် သတ်မှတ်ထားသော စံနှုန်းများထက် မနိမ့်ရဘဲ၊ တစ်နေ့လျှင် ကုန်တင်ကား အစီး ၆၀၀ အပြင် အခြေခံ အဆောက်အအုံများ ပြုပြင်ခြင်းနှင့် အပျက် အစီးများ ဖယ်ရှားရန် စက်ပစ္စည်းများ ဝင်ရောက်ခွင့် ပါဝင်သည်။

၈။ ကုလသမဂ္ဂနှင့် လခြမ်းနီအဖွဲ့၊ အစ္စရေး သို့မဟုတ် ဟာမတ်စ်နှင့် မသက်ဆိုင်သော အခြား နိုင်ငံတကာ အဖွဲ့အစည်းများမှ အကူအညီများကို ဖြန့်ဝေပေးရမည်။ (မည်သည့်ဘက်မှ ဝင်ရောက် စွက်ဖက်ခြင်း မရှိစေရ)။

၉။ ဂါဇာကို ယာယီ အသွင်ကူးပြောင်းရေး အစိုးရဖြင့် အုပ်ချုပ်ရမည်။ ၎င်းအစိုးရကို နေ့စဉ် ဝန်ဆောင်မှုများ ပေးအပ်ရန် တာဝန်ရှိသော ပါလက်စတိုင်း ကျွမ်းကျင်သူများ ဖြင့် ဖွဲ့စည်းရမည်။ ဤကော်မတီကို အမေရိကန်က အာရပ်နှင့် ဥရောပ မိတ်ဖက်များနှင့် တိုင်ပင်၍ ဖွဲ့စည်းမည့် နိုင်ငံတကာ အဖွဲ့အစည်းသစ်မှ ကြီးကြပ်မည်။ ၎င်းသည် ပါလက်စတိုင်းအာဏာပိုင်အဖွဲ့ (PA) က ၎င်း၏ ပြုပြင်ပြောင်းလဲရေး အစီအစဥ်ကို ပြီးမြောက်သည်အထိ ဂါဇာကို ပြန်လည် တည်ဆောက် ရန် ရန်ပုံငွေဆိုင်ရာ မူဘောင်ကို ချမှတ်ပေးမည်။

၁၀။ ခေတ်မီ အရှေ့အလယ်ပိုင်း မြို့များ တည်ဆောက်ရာတွင် အတွေ့အကြုံရှိသော ကျွမ်းကျင်သူ များကို ဖိတ်ခေါ်ခြင်းနှင့် ရင်းနှီးမြှုပ်နှံမှုများကို ဆွဲဆောင်ရန် အလုပ်အကိုင်များ ဖန်တီးရန် ရည်ရွယ် သည့် လက်ရှိ အစီအစဥ်များကို ထည့်သွင်းစဉ်းစားခြင်းဖြင့် ဂါဇာကို ပြန်လည် တည်ဆောက်ရန် စီးပွားရေး အစီအစဥ် တစ်ရပ်ကို ဖန်တီးရမည်။

၁၁။ ပါဝင်သော နိုင်ငံများမှ လျှော့ချထားသော အခွန်နှုန်းထားများနှင့် ဝင်ရောက်ခွင့်များကို ညှိနှိုင်းမည့် စီးပွားရေးဇုန် တစ်ခုကို ထူထောင်ရမည်။

၁၂။ မည်သူ့ကိုမျှ ဂါဇာမှ ထွက်ခွာရန် အတင်းအကျပ် မပြုရ။ သို့သော် ထွက်ခွာရန် ရွေးချယ်သူများကို ပြန်လာခွင့် ပြုရမည်။ ထို့အပြင် ဂါဇာဒေသခံများကို ဂါဇာကမ်းမြှောင်တွင် ဆက်လက်နေထိုင်ရန်နှင့် ပိုမိုကောင်းမွန်သော အနာဂတ်ကို တည်ဆောက်ရန် အခွင့်အရေး ပေးရမည်။

၁၃။ ဟာမတ်စ်သည် ဂါဇာ၏ အုပ်ချုပ်ရေးတွင် လုံးဝ အခန်းကဏ္ဍ မရှိစေရ။ ထိုးစစ်ဆင်ရန် စစ်ရေး အခြေခံအဆောက်အအုံ အားလုံး၊ ဥမင်လိုဏ်ခေါင်းများ အပါအဝင်၊ ဖျက်ဆီးရန်နှင့် ထပ်မံ မတည်ဆောက်ရန် ကတိပြုရမည်။ ဂါဇာ၏ ခေါင်းဆောင်အသစ်များသည် ၎င်းတို့၏ အိမ်နီးချင်း များနှင့် ငြိမ်းချမ်းစွာ အတူယှဥ်တွဲနေထိုင်ရေးကို ကတိပြုရမည်။

၁၄။ ဟာမတ်စ်နှင့် အခြား ဂါဇာ အုပ်စုများက ၎င်းတို့၏ တာဝန်ဝတ္တရားများကို လိုက်နာစေရန်နှင့် ဂါဇာက အစ္စရေး သို့မဟုတ် ၎င်း၏ ကိုယ်ပိုင်ပြည်သူများ အတွက် ခြိမ်းခြောက်မှု ရပ်စဲစေရန် ဒေသတွင်း မိတ်ဖက်များက လုံခြုံရေး အာမခံချက် ပေးရမည်။

၁၅။ ဂါဇာကမ်းမြှောင် ဒေသ လုံခြုံရေးကို ချက်ခြင်း စောင့်ကြည့် ဆောင်ရွက်ဖို့ ယာယီ နိုင်ငံတကာ တည်ငြိမ်ရေး တပ်ဖွဲ့ကို အမေရိကန်က အာရပ်နှင့် အခြား နိုင်ငံတကာ မိတ်ဖက်များနှင့် လက်တွဲ ပြီး ဖွဲ့စည်းမည်။ ဤတပ်ဖွဲ့သည် ဂါဇာရှိ လုံခြုံရေးကို ကြီးကြပ်ပြီး ရေရှည် ပြည်တွင်း လုံခြုံရေး အဖွဲ့အစည်းအဖြစ် ဆောင်ရွက်မည့် ပါလက်စတိုင်း ရဲတပ်ဖွဲ့ကို ဖွဲ့စည်း လေ့ကျင့်ပေးရမည်။

၁၆။ အစ္စရေးက ဂါဇာကို သိမ်းပိုက်ခြင်း သို့မဟုတ် ခွဲထုတ်ခြင်း မပြုရ။ အစ္စရေး ကာကွယ်ရေး တပ်ဖွဲ့ (IDF) သည် လက်ရှိ သိမ်းပိုက်ထားသော နယ်မြေကို အစားထိုး လုံခြုံရေး တပ်ဖွဲ့များက ထိန်းချုပ်မှုနှင့် တည်ငြိမ်မှုကို ထူထောင်သည်နှင့် အမျှ တဖြည်းဖြည်း လွှဲပြောင်း ပေးရမည်။

၁၇။ ဟားမတ်စ်က ဤအဆိုပြုချက်ကို နှောင့်နှေးစေခြင်း သို့မဟုတ် ငြင်းပယ်ခြင်း ပြုပါက အထက်ဖော်ပြပါ အချက်များကို အကြမ်းဖက်မှု ကင်းစင်သော နေရာများတွင် ဆက်လက် ဆောင်ရွက် သွားမည်။ ထိုနေရာများကို နိုင်ငံတကာ တည်ငြိမ်ရေး တပ်ဖွဲ့သို့ IDF က တဖြည်းဖြည်း လွှဲပြောင်းပေးရမည်။

၁၈။ အစ္စရေးက ကာတာကို နောက်ထပ်တိုက်ခိုက်မှုများ မလုပ်ဆောင်ရန် သဘောတူသည်။ ဂါဇာပဋိပက္ခတွင် ကာတာ၏ အရေးပါသော ကြားဝင် စေ့စပ်ပေးသည့် အခန်းကဏ္ဍကို အမေရိကန်နှင့် နိုင်ငံတကာ အသိုက်အဝန်းက အသိအမှတ် ပြုသည်။

၁၉။ အစွန်းရောက်မှု လျှော့ချရန် လုပ်ငန်းစဥ် တစ်ရပ်ကို ထူထောင်ရမည်။ အစ္စရေးနှင့် ဂါဇာ တို့က အတွေးအခေါ်တွေ နဲ့ ဇာတ်ကြောင်းတွေကို ပြောင်းလဲရန် ရည်ရွယ်သည့် ဘာသာပေါင်းစုံ ဆွေးနွေးမှုများ ပါဝင်သည်။

၂၀။ ဂါဇာကို ပြန်လည်တည်ဆောက်မှု အဆင့်မြှင့်တင်ပြီး ပါလက်စတိုင်းအာဏာပိုင်အဖွဲ့ (PA) ၏ ပြုပြင်ပြောင်းလဲရေး အစီအစဥ်ကို အကောင်အထည်ဖော်ပြီးပါက ပါလက်စတိုင်းပြည်သူတို့၏ ရည်မှန်းချက်အဖြစ် အသိအမှတ်ပြုထားသော ပါလက်စတိုင်း နိုင်ငံတော်တည်ထောင်ရေးအတွက် ယုံကြည်စိတ်ချရသော လမ်းကြောင်းတခု ပေါ်ပေါက်လာနိုင်မည့် အခြေအနေများ ရှိလာမည်။

၂၁။ အမေရိကန်က အစ္စရေးနှင့် ပါလက်စတိုင်းများအကြား ငြိမ်းချမ်းစွာနှင့် သာယာဝပြောစွာ အတူယှဥ်တွဲနေထိုင်ရေးအတွက် နိုင်ငံရေး အခွင့်အလမ်းကို သဘောတူရန် ဆွေးနွေးညှိနှိုင်းမှုများ စတင်ပေးမည်။