မင်းအောင်လှိုင်

ဒီဇင်ဘာ ၂၁ – ၂၀၂၅ စစ်ကော်မရှင် ဥက္ကဌက မနေ့က အလယ်ပိုင်းတိုင်းစစ်ဌာနချုပ်၊ မကွေး တပ်နယ် မှာ စစ်သည် အရာရှိ မိသားစုတွေကို တွေ့ဆုံ စကားပြောကြားရာ၊ မကြာခင်ကျင်းပမယ့် ရွေးကောက်ပွဲ အတွက် မဲပေးတဲ့ အခါ တပ်မတော်နဲ့ စိတ်တူကိုယ်တူ လက်တွဲ ဆောင်ရွက် နိုင်မယ့် ဒို့တာဝန် အရေးသုံးပါးကို လိုက်နာ စောင့်ထိန်း နိုင်မယ့် ဥပဒေ အသိပညာ ရှိသူတွေကို မဲပေးဖို့ လိုအပ်တယ်လို့လည်း ပြောကြားသွားပါတယ်။ ဒါ့အပြင် တိုင်းပြည်နဲ့ ဒေသကောင်းကျိုးကို အမှန် တကယ် ဆောင်ရွက်နိုင်သူ၊ နိုင်ငံရေး အုပ်ချုပ်ရေး စီးပွားရေး လုံခြုံရေးနဲ့ ဥပဒေ စိုးမိုးရေး အမြင်ရှိသူတွေကို ရွေးချယ်မဲပေးဖို့ကိုလည်း သူက မှာကြား သွားခဲ့ ပါတယ်။